O Grupo Municipal do PSdG-PSOE de Noia vén de rexistrar por escrito unha moción para tratar no pleno ordinario de mes de xullo a solicitude para nomear Fillo Predilecto de Noia ao deportista olímpico local, Caetano Horta Pombo.
Os socialistas, consideran “un feito histórico” que un deportista local vaia participar nos Xogos Olímpicos que se celebrarán nas vindeiras semanas en Tokio, e queren mostrar todo o seu apoio e recoñecemento aos esforzos e sacrificios que supón competir a un nivel tan alto, co nomeamento por parte da Corporación municipal de Caetano Horta Pombo como Fillo Predilecto da vila de Noia.
O voceiro socialista Roberto Iglesias indica que este nomeamento ” é a mellor maneira de apoiar ao noso deportista, e demostrar a ilusión e orgullo que supón para toda a veciñanza de Noia esta participación de Caetano na cita olímpica. Levando o nome da vila internacionalmente ata terras xaponesas, logo de participar e acadar resultados excepcionais en campionatos europeos e mundiais.”
O G. Municipal Socialista agarda que toda a corporación apoie esta medida, e poder realizar o nomeamento unha vez rematen os Xogos Olímpicos nunha cerimonia na que poida participar a cidadanía de Noia.
