Noia e Rianxo van ser novamente vilas astronómicas este verán. Esta conexión da nosa comarca coas estrelas vai ser posíbel, unha vez máis, grazas ao labor da Universidade de Santiago e o seu Observatorio Astronómico Ramón María Aller, que incluíu á nosa comarca no itinerario da iniciativa As estrelas do Camiño. Haberá sesións de divulgación en 22 concellos galegos entre xullo e setembro. A cita de Noia é o 20 de xullo e a de Rianxo o 16 de agosto. As dúas enmárcanse no ciclo As estrelas do Camiño. A primeira das sesións terá lugar o vindeiro 15 de xullo, ás 22.30 horas, no Miradoiro do Lapido en Padrón.
Cada actividade (dirixida ao público en xeral e co control de cada concello), vai consistir nunha charla previa sobre cuestións astronómicas de interese para logo pasar ás observacións, “tanto a simple vista, de recoñecemento de constelacións, identificación do triángulo de verán e mesmo da Vía Láctea”, explica o director do Observatorio José Ángel Docobo, que engade que as citas tamén incluirán observacións telescópicas con instrumental levado polo propio Observatorio. “Neste caso, os planetas, estrelas dobres, nebulosas e cúmulos estelares serán o obxectivo principal, mesmo a Lúa se é o caso”, sinala.
Durante as sesións, o público, que deberá respectar escrupulosamente as medidas sanitarias esixidas en cada concello, será informado sobre as características físicas de cada astro observado, mitoloxía e demais datos adicionais, coa finalidade de que a sesión sexa “non só un interesante encontro científico-cultural, senón unha forma tamén de pasalo ben dun xeito seguro nas nosas fermosas noites estivais”, matiza o profesor Docobo.
Logo da sesión celebrada o pasado venres en Melide, o Observatorio dará pulo tamén a novas accións de divulgación en Portomarín, Sarria, Mondoñedo, Arzúa, Ribadeo, O Pino, Fisterra e Santiago de Compostela, todas elas dentro do programa Camiños de estrelas, organizado polo Consejo Jacobeo, a través da iniciativa e coordinación técnica de Turismo de Galicia, en cinco Comunidades Autónomas. Alén das nove sesións galegas, realizaranse accións de divulgación astronómica en Aragón (3 sesións), Asturias (2), Cantabria (3) e Castela e León (7).
A coordinación científica deste macro proxecto corre a cargo do profesor José Ángel Docobo, e conta coa colaboración da Agrupación Astronómica de Burgos, Agrupación Astronómica Cántabra, Agrupación Astronómica de Huesca, Agrupación Astronómica Palentina, Asociación Cielos Despejados de Oviedo, Asociación Leonesa de Astronomía e a Sociedad Astronómica Asturiana OMEGA.
