O Concello de Boiro solicita un cribado entre a poboación nova para detectar casos asintomáticos

O Concello de Boiro celebrou este luns 12 de xullo unha nova sesión da Comisión de Seguimento da Evolución da COVID-19. Na xuntanza de traballo compartíronse os datos recentes da Consellería de Sanidade, nos que se reflicte unha suba exponencial do número de novos positivos nos últimos días. “Estamos moi preocupados pola evolución dos contaxios, polo que solicitamos xa un cribado entre a poboación máis moza para poder detectar casos asintomáticos e frear a expansión do virus”, sinalou o alcalde, José Ramón Romero, quen participou na sesión deste luns.

Na comisión tamén se informou do traballo do departamento de Servizos Sociais, que continúa coordinando os labores para asistir as necesidades derivadas da COVID-19 nas persoas con positivo ou illadas nos seus domicilios, labores como a recollida de lixo por parte do servizo municipal de Protección Civil ou derivacións a Cáritas e Cruz Vermella para a entrega de alimentos ou outros bens de primeira necesidade.

“Lamentamos que a programación cultural con motivo das festas do verán, deseñada cumprindo con todas as medidas de seguridade, servise como escusa para o descontrol e incumprir os protocolos hixiénico sanitarios”, afirmou o alcalde.

Polo que a Policía Local intensifica os controis e vixilancia, sobre todo durante a fin de semana, para evitar as aglomeracións de xente.