O Concello de Boiro e Medio Ambiente establecen liñas de traballo conxunto

O alcalde de Boiro, José Ramón Romero, e o concelleiro de Medio Ambiente, Raúl Treus, reuníronse onte coa conselleira de Medio Ambiente, Ángeles Vázquez, e a directora xeral de Patrimonio Natural, Belén Docampo, para tratar de chegar un acordo e establecer unhas liñas de traballo conxuntas entre as distintas administracións.

Neste contexto, o alcalde de Boiro presentou un proxecto para a recuperación ambiental da charca de Abanqueiro. Dita iniciativa executaríase por fases e implicaría o control da vexetación exótica da zona para evitar danos nos ecosistemas, a recuperación de augas libres e da diversidade estrutural e biolóxica da charca, e a ordenación do uso público para o seu desfrute e conservación a longo prazo.

Doutra banda, Romero trasladou que a necesidade dos empresarios por rematar a conexión pendente entre a Fase I e a Fase II do Polígono Industrial de Espiñeira. Esta actuación contempla un Proxecto de escavación arqueolóxica na área do Túmulo 3 de As Chans para a súa protección e conservación. Máis tarde, dixo, habería que proceder á urbanización do Plan Parcial do Parque Empresarial de Espiñeira, proxectada dende o ano 2008.

Pola súa parte, a conselleira de Medio Ambiente interesouse pola evolución das obras de rehabilitación do Pazo de Goiáns e a posibilidade de incluír diversas especies do Catálogo de Árbores Senlleiras.