Membros do comité de FCC, empresa concesionaria da planta de residuos de Lousame, reuníronse na mañá deste 9 de xullo co alcalde de Carnota, Juan Manuel Saborido. O obxectivo da xuntanza, segundo sinalaron os participantes, foi requirir certezas sobre o futuro da planta e dos postos de traballo actuais. Cómpre lembrar que o rexedor carnotán asumiu o pasado mes de xuño a presidencia da Mancomunidade da Serra do Barbanza, propietaria dunhas instalacións que empregan aproximadamente a 140 persoas.
Os representantes dos traballadores e das traballadoras transmitíronlle a Saborido a súa preocupación ante informacións coñecidas nas últimas semanas, que apuntaban a un posíbel cambio no modelo de xestión, polo seu impacto no emprego.
Segundo CCOO do Hábitat, Saborido comprometeuse a manter “contacto directo” coa representación legal do persoal da planta para facerlle chegar de primeira man “calquera novidade que se produza”, se ben evitou afondar en cuestións concretas porque leva poucos días á fronte da Mancomunidade.
Pola súa parte, desde o comité pedíronlle a Saborido que se liciten “canto antes os novos pregos de contratación do servizo” e que neles “se especifique con claridade que a planta continuará a traballar co actual modelo de xestión de residuos, desbotando opcións que incluso contan coa reprobación de Europa”.
