O BNG ribeirense vén de anunciar unha xornada sobre os abusivos presos da electricidade o vindeiro sábado 3 de xullo. Pola mañá está previsto facer unha nova recollida de sinaturas contra a suba da factura de luz na avenida do Malecón. Pola tarde, ás 20:30 horas no Centro Cultural Lustres Rivas, os nacionalistas realizarán un acto público coa deputada Rosana Pérez e Xavier Santamaría, consultor enerxético onde se detallarán os motivos dos prezos das facturas.
Desde a sede bloquista destacan a Galicia como unha das principais fontes de electricidade de España, mais segue sen beneficiarse desa riqueza, e aseguran que “as pemes pagan cada vez máis pola factura da luz, o que implica un boom eólico depredador que ameaza a supervivencia do rural”. Pérez Barral comentou a posibilidade dunha solución, que pasaría pola aposta “da tarifa eléctrica galega para abaratar o prezo da luz, un método que xa está en marcha en moitos países europeos”.
Para facer fronte a esta proposta, o BNG defende a intervención pública no sector enerxético e pon sobre a mesa medidas concretas e realizables se hai vontade política. A redución do IVE da luz ao 4% fronte ao 21%, unha tarifa eléctrica e por último a creación dunha empresa pública galega de enerxía son tres das claves para facer posible esta proposta, apuntan dende a sede nacionalista.
