Medio cento de nenas e nenos de Porto do Son poderán participar este verán nas Xornadas de Iniciación ao Triatlón

O Concello de Porto do Son e o Club Artrogal presentaron as súas Xornadas de Iniciación ao Triatlón, cuxo obxectivo é “introducir nesta tripla práctica deportiva a nenas e nenos das categorías de base”. Trátase, segundo explicaron os responsábeis da iniciativa en rolda de prensa, “dunha actividade recreativa, lúdica e de ocio”, botando man da fórmula infalíbel da diversión para afianzar aos rapaces nas tres disciplinas que se inclúen (o ciclismo, o running e a natación) e no desenvolvemento de prácticas saudábeis que lles serán de utilidade ao longo das súas vidas.

As xornadas están dirixidas a nenos e nenas de entre 6 e 14 anos, divididas en dous grupos de 25, o primeiro, con horario de 17:30 a 19:00, de idades entre os 6 e os 9 anos, e o segundo, con horarios entre as 19:30 e as 21:00, para as idades de 10 a 14 anos. A inscrición é de balde e pode facerse a través de deportesdoson@gmail.com.

Dende a Concellería de Deportes do Son indican que un dos seus obxectivos é “promover o deporte de base, en idades escolares, proporcionando ás nenas e nenos tódalas alternativas que estean nas nosas mans para que se enganchen ao deporte e fagan del un hábito é incluso un estilo de vida, porque o deporte ben entendido é marabilloso, todo son beneficios”.

O concelleiro Manel Deán aproveitou a súa intervención na rolda para agradecer a colaboración do Clube Artrogal Tri 498, entidade cunha dilatada experiencia neste deporte do triatlón, “cos que agardamos seguir colaborando no futuro”.