Este verán o impulso turístico do Barbanza (un impulso que buscou a máxima compatibilidade coas medidas que garanten a seguridade sanitaria de veciños e visitantes) chegou a todos os recantos, non só aos máis especificamente ligados ao litoral, senón tamén aos grandes pulmóns verdes dos nosos concellos. Un exemplo disto é o Parque Periurbano de San Roque, en Ribeira, unha moi destacada área de importancia educativa, recreativa e ambiental, cuxas vertentes lúdicas, divulgativas e naturais veñen de ser reforzadas polo Concello. O obxectivo do Goberno local non é outro que seguir convertendo o parque nun referente no coidado e o respecto pola natureza, “colaborando coa conservación da nosa imporante herdanza paisaxística”.
O proxecto para o seu impulso xira arredor do acondicionamento de zonas comúns, actividades medio ambientais, culturais, deportivas e de dinamización social. “Todo un conxunto de recursos co único fin de aportar, axudar e crecer co entorno”, explícase nas bases da iniciativa, cuxos primeiros pasos xa se poden apreciar de maneira clara na limpeza integral da contorna e máis na posta en marcha dunha actividade que fala ás claras do devandito obxectivo de converter o parque nun referente no coidado pola natureza: a actividade Adopta unha árbore. A través dela, os padriños e madriñas faranse cargo dos coidados da árbore que escollan. Será “unha homenaxe a un ser querido ao tempo que se achegan aos cativos a natureza”, explica o Concello, engadindo que calquera pode participar nesta actividade que ten como obxectivo contribuír á rexeneración do bosque autóctono do parque.
O sábado 7 de agosto será a festa da adopción. As 9:30 os participantes da actividade partirán dende a praza do Concello ata o parque. Entre a 10:00 e as 11:30 farase un roteiro polo parque para visitar as árbores apadriñadas. Haberá xantar popular dende as 12:30 amenizado con actuación musical e contacontos.
O Concello engade que esta iniciativa é “só o comezo dun programa máis amplo”, que incluirá outras accións que irán sendo compartidas nas redes sociais (Facebook, Instagram e Telegram) para “ninguén se perda ningunha”.
