Devolven ao mar os golfiños varados en Rianxo

A Policía Local de Rianxo deu novas informacións sobre o rescate de golfiños que se estivo a realizar na mañá deste xoves 22 na contorna da ponte da autovía en Taragoña, por mor do devalo da marea, que deixou varados a catro cetáceos (catro machos seguramente á procura de comida) sen posibilidade de volver á ría. Nun vídeo achegado no seu Facebook, a policía mostra como se puxo remate aos traballos de rescate, devolvendo ao mar aos exemplares.

Nos traballos participaron axentes da Policía Local de Rianxo, técnicos do CEMMAcetaceos (coordinadora galega para a defensa e o estudo dos mamíferos mariños), operarios da brigada de obras do Concello de Rianxo, Obras e Servizos Municipais, voluntarios de Protección Civil Rianxo Perfil Oficial e persoal da Confraría de Pescadores.

Os cetáceos varados foron albiscados este xoves pola mañá por un camioneiro que circulaba pola autovía, que deu a voz de alarma á Policía Local. Os catro golfiños foron trasladados a bordo de dúas embarcacións (unha de Protección Civil e outra da Confraría) cara ao interior da ría. Foron ceibados ao mediodía na contorna da illa de Rúa, xa en Ribeira.