O Concello de Boiro comezou as obras para a execución de beirarrúas e servizos no lugar de Esteiro, en Cabo de Cruz. A actuación, que consta dun orzamento total de 82.666,21 euros, vaise levar a cabo con cargo ao Plan Único Concellos POS 2020 da Deputación da Coruña.
O proxecto contempla a execución de beirarrúas e servizos na beira sur do lugar de Esteiro, na parroquia de Castro, “seguindo o trazado das existentes”, explicou o Concello engadindo que “con esta actuación vaise dotar de seguridade viaria aos peóns que circulan entre o núcleo de Esteiro e a estrada que une Boiro e Cabo de Cruz, a DP-1107”.
Amais, o proxecto abrangue a materialización da rede de recollida de pluviais e a mellora da traída municipal de auga potábel, instalando tamén bocas de incendio para a prevención de riscos provocados polo lume. No lugar vanse instalar conducións para a recollida de pluviais e as canalizacións de auga para consumo. Unha vez instaladas vaise proceder á execución das beirarrúas de 1,50 metros de ancho.