Colle corpo unha guía de boas prácticas para mellorar a integración paisaxística dos nosos portos

A conselleira de Medio Ambiente, Territorio e Vivenda, Ángeles Vázquez, a conselleira do Mar, Rosa Quintana, e o decano do Colexio de Enxeñeiros de Camiños, Canais e Portos, Enrique Urcola, veñen de asinar un convenio de colaboración para a redacción dunha guía de boas prácticas para os portos autonómicos en materia de paisaxe, un manual con recomendacións, que está incluído no Plan estratéxico da paisaxe galega 2021-2024.

O obxectivo da guía consiste en evitar o impacto na paisaxe das instalacións portuarias da Xunta de Galicia. Os traballos, que comezarán este ano tras analizar o estado actual das instalacións portuarias, dispoñen dun investimento de 40.000 euros. “Este proxecto responde ao obxectivo de fomentar a recuperación dos espazos degradados, poñer en valor e conservar as paisaxes rurais, urbanas, costeiras e de interior, é dicir, todas as paisaxes de Galicia, que son abundantes en cantidade e calidade”, destacou Ángeles Vázquez.

Pola súa parte, Rosa Quintana explicou que a integración entre as vilas e os portos é fundamental para o seu desenvolvemento e que nela deben terse en conta os aspectos paisaxísticos. De feito, asegurou que esta guía vai permitir adecuar e protexer os peiraos galegos para facelos máis atractivos tanto para os veciños e usuarios como para os visitantes.

Cómpre mencionar que a primeira guía publicada foi no ano 2012 e consistiu nun estudo de impacto e integración paisaxística. Ademais, no 2020, publicáronse dúas máis: a guía de boas prácticas en intervencións en espazos públicos e a de integración de actividades extractivas. Así que, polo momento, hai 9 guías publicadas, que son máis se contamos as que están sen divulgar.

En definitiva, esta labor contribuirá a mellorar a imaxe dos portos, a visión do sector e o seu atractivo patrimonial, etnográfico, turístico e cultural. “As instalacións portuarias deben ser funcionais e prácticas”, comentan as conselleiras. Así que, apostar por unha integración paisaxística dos espazos portuarios é poñer en valor a paisaxe que conforman as dársenas e terreos anexos ou auxiliares, vinculados ás diferentes actividades (lonxas, talleres, almacéns, cafeterías…) que se atopan no ámbito portuario e, en consecuencia, dar un pulo á calidade de servizos dos traballadores e usuarios.