Cabo de Cruz deu voz nunha xornada ás mulleres rañeiras

A concelleira de Igualdade, María Outeiral, participou na xornada As mulleres rañeiras: escoitando a súa voz, que forma parte do programa O Sal do Mar. A actividade celebrouse este xoves 8 de xullo no Centro Social de Cabo de Cruz e ten como obxectivo dar visibilidade ao traballo e aos retos aos que se enfrontan as mulleres do sector.

Na xornada, puidéronse coñecer as experiencias de tres mulleres do sector: Raquel Souto, mariscadora a flote e armadora na confraría de Cabo de Cruz; Rosana Gago, mariscadora a flote e armadora na confraría de Carril; e Dolores Gómez, bateeira e presidenta da Asociación de Mulleres do Mar de Arousa. Ademais, durante a intervención, María Outeiral, salientou “a importancia de desenvolver programas como este, que teñen como finalidade promover o papel da muller no sector do mar e difundir a importancia e recoñecemento social do seu traballo”.