O Concello de Boiro, xunto coa Fundación Deportivo e a Escola de Fútbol Municipal, promove unha nova edición do Depor Campus, que se vai celebrar entre os días 5 e 9 de xullo no Campo de Fútbol de Valiño.
O concelleiro de Deportes, Marcos Fajardo, participou na mañá deste 10 de xuño na rolda de prensa na que tamén estiveron o coordinador de fútbol base do RC Deportivo da Coruña, Pablo Barros; o coordinador da EFM, Juanvi Cameán; e o directivo da EFM, Julio García.
Segundo informaron, esta será a cuarta edición do Depor Campus que se celebre en Boiro. Porén, debido ás restricións sanitarias, as prazas están limitadas a 60 participantes e os grupos serán reducidos para cumprir con todas as medidas. Seguindo este fío, a directiva da Escola de Fútbol Municipal fixo fincapé nos protocolos hixiénico-sanitarios que “se van seguir” e “na boa acollida que o campus tivo na pasada edición”.
A actividade está destinada a nenos e nenas de idades comprendidas entre os 6 de os 14 anos e ten como obxectivo formar aos participantes en tecnificación deportiva e tamén transmitir os valores do deporte e do fútbol.
O concelleiro de Deportes, Marcos Fajardo, mostrou o seu agradecemento a todas as partes colaboradoras na organización deste campus xa que “o deporte é fundamental para os nosos nenos e nenas”.
Dende a coordinación do Campus anunciaron que as inscricións están abertas e que se poden facer a través da web www.deporcampus.rcdeportivo.es ata o vindeiro xoves día 1 de xullo.
