Avanza no Son o proxecto para habilitar unha área de autocaravanas na Telleira, en Miñortos

Malia que Boiro e Carnota son referentes en materia de servizos para turistas de autocaravana, está claro que non van ser os únicos concellos da nosa comarca con vontade de aparecer nos mapas xeolocalizados deste tipo de turistas, cada vez máis presentes por estas datas. Se os días pasados falamos do mini-servizo para autocaravanas instalado en Broña (Outes), hoxe damos conta dunha iniciativa do Concello de Porto do Son para avanzar no ordenamento desta actividade turística en auxe no termo municipal (onde non existe unha área habilitada para acoller de xeito regulado estes vehículos).

Área de autocaravanas de Praia Xardín en Boiro

Segundo fixo saber a tenente de alcalde, María Maneiro, “é preciso regular a chegada destes vehículos, en parte porque estas chegadas son cada vez máis frecuentes, e en parte porque é habitual que se atopen con dificultades para estacionar correctamente e dispoñer das infraestruturas e servizos necesarios”.

Segundo comentou, unha das opcións para habilitar unha área específica destinada autocaravanas era a contorna das Furnas, en Xuño, que é un destino habitual deste tipo de turistas e onde hai un interese veciñal por habilitar servizos regulados, pero existe un impedimento claro para facer avanzar o proxecto: a maior parte da contorna está catalogada dentro da Rede Natura 2000. Malia que o Concello anunciou que tentará buscar unha solución a esta limitación (buscando compatibilizar a protección medioambiental da zona con medidas que garantan o correcto estacionamento), a opción que cobra máis peso polo de agora sería a de acondicionar un estacionamento específico en Miñortos, na Telleira.