As embarcacións tradicionais homenaxearon en Dodro e Padrón a Rosalía de Castro

O sábado 24 de xullo, encadrada no programa de actividades conmemorativas do Día de Galicia (25 de xullo), celebrouse unha xuntanza de embarcacións tradicionais galegas nos ríos Ulla e Sar. Estamos a falar do acontecemento cultural Inchadiña Branca Vela (homenaxe a Rosalía de Castro) que fixo recalada no Agro das Silvas (Dodro) e que incluíu unha remontada até o paseo do Espolón, en Padrón.

A singradura fluvial de dornas tradicionais procedentes de todo o país foi un tributo ao legado de Rosalía e, en concreto, a aquelas embarcacións que a nosa poeta plasmou e homenaxeou en Cantares Gallegos. Foi a novena edición dunha xeira poético-mariñeira na que participaron dornas, gamelas e galeóns chegadas das rías de Vigo, Pontevedra, Arousa e Ribadeo, ademais da Guarda.

Organizou a Fundación Rosalía e a Asociación Cultural Dorna da Arousa, coa colaboración dos Concellos de Padrón, Dodro e Valga. Logo da chegada das dornas a Padrón, celebrouse un concerto do grupo portugués Canto d’Aqui na Praza de Macías.