A asociación Amicos, entidade social e solidaria do Barbanza centrada na atención e na inclusión de persoas con diversidades cognitivas ou motrices, é unha das finalistas na décima edición dos Premios Solidarios Orange co seu proxecto #BancoTICOrange, unha proposta para cambiar o mundo propiciando un cambio integral no noso xeito de producir e consumir tecnoloxía.
En concreto, #BancoTICOrange xorde do compromiso de Amicos por impulsar a loita contra o cambio climático dende a sustentabilidade e a economía circular, promovendo o alongamento da vida útil dos dispositivos electrónicos (e das Tecnoloxías da Información e a Comunicación, as TIC) e implicando profesionalmente a persoas en risco de exclusión. Polo tanto, #BancoTICOrange non só se dirixe a combater o quecemento da Terra, senón tamén a tirar abaixo barreiras, de xeito complementario, en materia de igualdade social.
Os Premios Solidarios Orange son unha iniciativa da operadora de telecomunicacións do mesmo nome e teñen o obxectivo de ir alén do negocio tradicional de telecomunicacións, “xa que axudan a crear valor” e representan o compromiso social da empresa. Establécense tres categorías: Cambio climático, Inclusión dixital e Uso responsábel.
