A Xunta permitirá aos concellos da comarca contratar 16 persoas en desemprego para a prevención de incendios

A Xunta vén de resolver a convocatoria de axudas deste ano do programa Aprol Rural, destinadas a apoiar aos concellos na contratación de persoas desempregadas para a realización de servizos de prevención de incendios, entre outros. Na comarca do Barbanza beneficiaranse 11 municipios, que percibirán unha contía de 220.000 euros, coa poderán contratar 16 persoas. En Galicia, en global, apoiarase a contratación de 505 persoas sen emprego en 284 concellos a través dun investimento de sete millóns de euros.

En boa medida, as persoas desempregas realizarán tarefas relacionadas coa prevención de incendios nas faixas secundarias definidas pola Lei de prevención e defensa contra os incendios forestais de Galicia. Na orde de axudas deuse prioridade aos concellos fusionados e os emprendedores. Os contratos terán unha duración de 9 meses a tempo completo.

O obxectivo da iniciativa é “incrementar e mellorar as oportunidades laborais do rural de Galicia, mediante a contratación de persoas desempregadas, e dar un impulso aos traballadores das zonas menos poboadas da Comunidade Autónoma”.

Estas contratacións únense aos apoios xa aprobados pola Xunta destinados aos concellos do Barbanza para impulsar a contratación do servizo de socorristas que é competencia municipal. No caso desta comarca, a Consellería de Emprego e Igualdade financiará a contratación de 55 socorristas en 9 concellos cun investimento de 178.000 euros.

Por concellos, este será o importe que reciba cada un ao abeiro destas axudas:

Boiro: 2 contratacións e 28.750,00 €

Carnota: 1 contratación e 13.557,24 €

Lousame: 1 contratación e 13.749,93 €

Mazaricos: 1 contratación e 13.750,00 €

Muros: 1 contratación e 13.565,61 €

Noia: 2 contratacións e 27.500,00 €

Outes: 1 contratación e 13.750,00 €

A Pobra: 1 contratación e 13.750,00 €

Porto do Son: 2 contratacións e 27.500,00 €

Rianxo: 2 contratacións e 27.500,00 €

Ribeira: 2 contratacións e 27.500,00 €

O total é de 220.872,78 €