O Concello de Ribeira informou da apertura do prazo para matricularnos nas actividades formativas do cuarto Ciclo da Universidade de Santiago, que ten edicións nun feixe de concellos, incluído o de Ribeira. O prazo estará aberto entre o 21 de xuño e o 30 de xullo. Todas as persoas maiores de 50 anos que o desexen poden formalizar a súa matrícula na páxina web da Universidade de Santiago.
A formación universitaria a partir dos 50 anos é posíbel en Ribeira grazas ao convenio asinado en 2019 entre a USC e o Concello de Ribeira, que fai saber que “a creación dunha sede universitaria do IV Ciclo dirixida a persoas maiores de 50 anos, promove a formación continua, a democratización dos estudos universitarios, en definitiva a universalización da formación universitaria trasladándoa da capital de Galicia á cabeceira da comarca do Barbanza”.
Este curso 2021-2022 a oferta formativa na sede de Ribeira do IV Ciclo da USC é a seguinte:
• 1º cuadrimestre: Nutrición; Patrimonio Bibliográfico; Aprendizaxe Emocional e Benestar
• 2º cuadrimestre: Introdución á Zooloxía; Psicoloxía; Historia da Arte Galicia
Para máis información contactar co 881 814 588 ou coa USC a través da conta ivciclo@usc.es.