O Concello de Boiro, a través do servizo municipal de Deportes, presenta a oferta formativa de actividades deportivas para este verán. Así, nos meses de xullo e agosto vaise fomentar a práctica deportiva a través da realización de deportes como remo, volei praia ou taekondo.
O concelleiro de Deportes, Marcos Fajardo, e o técnico municipal de deportes, Manuel González, presentaron na mañá deste 14 de xuño a oferta de actividades para a tempada estival, a cal inclúe propostas como son remo, piragüismo, volei praia, baloncesto, atletismo, tenis, iniciación ao taekwondo e vela.
Ademais, Os Veráns Deportivos abranguerán tamén actividades para mozos e adultos, ximnasia para xubilados e o Boiro Actívate para persoas con doenzas especiais.
Doutra banda, o programa inclúe competicións deportivas dos propios clubs, que se organizan coa colaboración do Servizo Municipal de Deportes: o II Campus Deportivo Rufino Regueira de natación e tríatlon, o VIII Campus de Baloncesto Obradoiro CAB, o campus de volei e de volei praia, o Campionato Galego de Vela por Equipos, o Depor Campus, a IV Travesía Illa da Bensa ou a Liga ACT de traíñas.
O prazo de inscrición ás actividades abre o 15 de xuño. Para máis información, pódese consultar a páxina web do servizo de Deportes do Concello de Boiro ou acudir de xeito presencial á Casa da Cultura de Boiro. Tamén está activo o teléfono 981 84 84 25 e o enderezo electrónico deportes@boiro.org.
