O concelleiro de Deportes de Boiro, Marcos Fajardo, e o concelleiro de Turismo, Raúl Treus, mantiveron este primeiro de xuño unha xuntanza coa dirección do Centro Internacional de Navegación de Arousa (CINA) para trazar liñas de traballo conxunto entre as dúas entidades para o desenvolvemento da vela no municipio.
Por parte do CINA asistiron o presidente, Jorge Benedet; o vicepresidente primeiro, Ramón Ares; a vicepresidenta segunda, Silvia Gerbolés; o tesoureiro, José Miguel Montejo; e un vogal, Luis Villaverde.
Os representantes do centro mostraron perante o Concello de Boiro os cursos de formación de vela lixeira que a entidade vai levar a cabo este verán en augas do termo municipal. En total vanse realizar 7 cursos, 3 no mes de xullo e 4 no mes de agosto. Tamén engadiron que para este verán ofrécense 14 bolsas para boirenses, dúas en cada curso, coas que “se financia a participación na actividade e só sería preciso aboar as taxas correspondentes”, explicaron os responsábeis da entidade.
Ademais dos cursos de formación durante o verán, dende e dirección do CINA propuxeron ao Concello outras actividades relacionadas coa concienciación ambiental e a promoción turística.
O Centro Internacional de Navegación de Arousa constituíuse no verán de 1968 e ten base en Boiro, na Punta do Chazo, dende fai 30 anos.
Toda a información sobre as actividades e inscricións poden facerse a través da web do CINA.
