O Concello de Boiro celebra o VI Campionato Galego Inclusivo Fibralar de Motonáutica na modalidade slálom

O Concello de Boiro colabora co club ADECO-DEA na celebración do VI Campionato Galego Inclusivo Fibralar de Motonáutica na modalidade slálom, que se celebrará nas instalacións do Club Náutico de Boiro este sábado, 19 de xuño.

O Campionato Galego de Motonáutica na modalidade de slálom é unha proba de habilidade no manexo de embarcacións. Segundo José Barrio, o presidente de ADECO-DEA, “a motonáutica inclusiva xurdiu hai seis anos en Galicia con interese de que as persoas con discapacidade puidesen desfrutar do entorno náutico. Propúxose este campionato con esta modalidade, que non se trata dunha proba de velocidade senón de habilidade no manexo dunha embarcación”. Na mesma liña, o presidente do club náutico de Boiro, Manuel Fajardo, sinalou que “é un orgullo volver a celebrar esta actividade”.

Doutra banda, o concelleiro de Deportes, Marcos Fajardo, agradeceu ao club e ao náutico a súa implicación para levar a cabo este tipo de probas e convidou a toda a veciñanza a que se achegue a ver o campionato o vindeiro sábado.