O BNG de Ribeira solicitou ao Concello unha mellora nas instalacións do Conservatorio Profesional de Música Enrique Paisal, aumentando os contratos e as horas do profesorado, co fin de atender a demanda do alumnado.
O concelleiro Luís Pérez Barral explicou que “o centro precisa dunha reforma integral de maneira urxente que permita a insonorización das aulas que eviten o ruído do tráfico ou atallar as humidades e o frío que rexistra no inverno e as altas temperaturas que se rexistran coa chegada do bo tempo”.
Ademais, sinalou que “a humidade se estende polos tres andares e provoca a aparición de fungos que poden prexudicar a saúde do alumnado e do profesorado”.
Tamén lembrou que o profesorado “atópase actualmente con contratos de menos de 30 horas” e isto, dixo, “provoca serios inconvenientes á hora de impartir as aulas, tendo que aglutinar tantos instrumentos como poden nunha mesma aula para os cales non existe repertorio común ou, simplemente, o seu conxunto non ten un interese nin musical nin didáctico para o alumnado”.
Desta forma, o partido nacionalista pídelle ao Goberno local novas medidas para emendar os problemas acontecidos.
