O Equipo de Estafas Telemáticas da Garda Civil de Noia procedeu a investigar a unha veciña da localidade de Boiro, como cooperadora nun delito de estafa menos grave. A denuncia foi interposta polo prexudicado a quen se lle dixo da posibilidade de investir no negocio da extracción de ouro en Ghana, cunha suposta rendibilidade do 320% a partir do terceiro mes. Así, realizara un investimento inicial de 10.000 dólares sen obter ningún beneficio, ademais de non poder contactar coa persoa informante.
Tras a análise da información solicitada pola Garda Civil obtivose a identificación da persoa que supostamente puxera en contacto ao denunciante co responsable en Ghana das minas de ouro. A Benemérita procedeu á investigación desta persoa, como presunta cooperadora necesaria dun delito menos grave de estafa.
