Dous centenares de escolares baixan este martes a limpar as nosas praias na compaña de JEALSA e Cruz Vermella Boiro

Coincidindo coa celebración do Día Mundial dos Océanos, este martes 8 de xuño o alumnado da nosa comarca participante no programa LudiEduca, impulsado pola Asemblea da Cruz Vermella de Boiro e a conserveira JEALSA, levarán a cabo un importante e exemplar traballo de limpeza conxunto e simultáneo en diferentes areais dos concellos da Pobra e Boiro. O obxectivo é “concienciar aos máis cativos da importancia que teñen os mares para todas especies e, en consecuencia, tamén para a vida humana”.

Participan arredor de 200 escolares do CEIP de Escarabote (en Barraña a partir das 10.00 horas), o CEP Pilar Maestú Sierra (na zona da praia do Saltiño ás 10.00 horas), o CEP Salustiano Rey Eiras (na praia do Areal ás 9.00 horas), o CEIP Praia Xardín (en Barraña a partir das 10.00 horas, na entrada do paseo dende o IES A Cachada), o CEIP Santa Baia (en Barraña dende o antigo Galeón, ás 10.00 horas), o CEIP Santa María do Castro (en Carragueiros ás 10.00 horas) o o CEIP Cespón (Carragueiros ás 10.00 horas).