Ecoloxistas en Acción compartiu este 29 de xuño a súa listaxe de Bandeiras Negras por contaminación, unhas distincións en negativo que salientan e visualizan os que serían os exemplos do que nunca debera facerse en materia de medio ambiente e xestión dos recursos naturais. Na comarca temos a dubidosa honra de ter unha Bandeira Negra: a outorgada pola organización ecoloxista a Sacyr polas minas de San Finx, en Lousame. O motivo? En palabras de Ecoloxistas en Acción, “as verteduras con metais pesados tóxicos que se veñen producindo de forma continuada e pola ameaza que supoñen as presas de residuos mineiros das que a concesionaria, filial de Sacyr, non quere facerse cargo”.
Esta é a segunda bandeira negra outorgada polo colectivo ecoloxista, logo de terse incluído no seu Informe Bandeiras Negras de 2017.
O informe é resultado da análise sobre a situación ambiental das costas e do entorno litoral que realiza Ecoloxistas en Acción, no que se destacan as zonas con peor estado ambiental do Estado e as actuacións irresponsables por parte de administracións públicas, que promoveron a destrucción ou teñen posto en perigo o litoral. No caso de San Finx, está constatado o impacto por metais pesados no Esteiro do Tambre, en plena Rede Natura 2000, como se evidenciou en recentes publicacións científicas.
Frente á imaxe idílica das Bandeiras Azuis, desde Noia ea plataforma Vida e Ría ou Minería? lembran “a degradación á que se está sometendo ás nosas costas, colocando en risco o delicado equilibrio entre recursos e acción humana que posibilita que a nosa ría sexa unha das zonas marisqueiras máis ricas e productivas do Estado”.
