A Concellería de Cultura do Concello de Boiro presentou este venres 25 de xuño unha nova edición da revista Folía, que se edita no marco das Festas do Verán 2021 servindo de homenaxe específico ás mulleres coidadoras, que son, en palabras do dito departamento municipal “as raíñas das festas deste ano”. Na presentación estiveron o alcalde, José Ramón Romero, e a concelleira de Cultura, María Outeiral, acompañadas dunha representación das homenaxeadas.
Mercedes, Manola, Marina, Marta, Rosa ou Romina son algunhas destas mulleres que coidan doutras persoas dependentes ou menores de idade, unha figura que se pretende poñer en valor con esta publicación e as grandes homenaxeadas nas festas do verán. “Elas son enfermeiras, profesoras, traballadoras de centros de día ou escolas infantís, nais ou avoas”, explicaron Romero e Outeiral.
A revista deste ano editouse nun formato moi semellante ao das últimas edicións e nela recóllense fotos das festas do verán, o programa das festas, e textos de escritores e comunicadores locais, como Charo Lópes, Moncho Ares, Antón Gallardo, Xosé Manuel Triñanes, Rita Sánchez Dosil, Estevo Silva, Patricia Giao, Natalia Romero, Susana Mariño, Maite Mosconi e Luis Ferreirós.
Ademais inclúense anuncios de empresas e comercios locais de todos aqueles negocios que sempre participan coa publicación e outros novos que abriron durante o último ano. Este patrocinio é gratuíto para todas elas, xa que a revista a financia integramente o Concello de Boiro como agradecemento a todas esas empresas locais nestes momentos difíciles despois da COVID-19.
