A Xunta publica República Sideral, da rianxeira Esther F. Carrodeguas

A Xunta publicou as obras gañadoras dos premios para textos teatrais Álvaro Cunqueiro e Barriga Verde, tres títulos de literatura dramática galega que vén de ver a luz nas coleccións que a Consellería de Cultura mantén con Edicións Xerais e Baía Edicións.

Trátase de As desterradas, coa que Carme Varela obtivo o XXV Premio Álvaro Cunqueiro para textos teatrais, así como das gañadoras do XIV Barriga Verde de textos para teatro de monicreques: República Sideral, da rianxeira Esther F. Carrodeguas, na modalidade para adultos, e Pois eu!, de Carlos Losada Galiñáns, na de rapaces. Os tres títulos poden adquirirse tanto na Libraría Institucional da Xunta como nos principais puntos físicos de venda.

República Sideral

A obra publicada da actriz, directora e escritora rianxeira Esther F. Carrodeguas é, unha farsa esperpéntica que parte dun episodio pouco coñecido da historia de Galicia: a declaración da República Federal Independente da Illa de Arousa durante unhas horas entre o 7 e o 8 de outubro de 1934. Botando man do humor e do deostado teatro da cachaporra, Carrodeguas propón unha reflexión sobre o absurdo da condición humana, a guerra, os enfrontamentos ideolóxicos e as mortes gratuítas.