Seis estudantes de Noia participan no proxecto As aventuras de Luli

O Concello de Noia vén de informar da posta en marcha dunha iniciativa docente, lúdica e tecnolóxica directamente encamiñada ao desenvolvemento da rapazada e fomentar hábitos saudábeis. Trátase de As aventuras de Luli, un proxecto impulsado por un grupo de alumnos do Grao en Mestre de Educación Infantil da USC (45 mozas e mozos) no que participan 6 estudantes noieses.

A súa proposta consiste nunha serie de 14 vídeos, que soben cada semana á sua páxina de Facebook (e tamén a Instagram e Youtube), nos que os rapaces deberán axudar á mascota, chamada Luli, a superar as probas que se propoñen en cada localización dun mapa máxico. Desta forma, lograrán unha chapa ou insignia en cada lugar no que superen o reto.

Implicación das familias

Nestas pezas audiovisuais participan activamente (axudando á mascota) nenas e nenos de entre 0 e 6 anos. Serán as propias familias, as que a partir dun modelo presentado nas redes sociais poidan elaborar as súas propias chapas ou insignias, segundo explica o profesor Javier Rico, un dos impulsores desta iniciativa xunto co profesor Geno Rodríguez, e que botou a andar este 29 de abril da man da Asociación Recreativa e Cultural Os Tilos (Arcostilos), así como da Rede de Centros Socioculturais de Santiago de Compostela. O proxecto está tamén dirixido ao profesorado de centros de Educación Infantil para que poidan empregar o material creado co seu propio alumnado.