A conselleira do Mar, Rosa Quintana, participou este 18 de maio na presentación da travesía náutica xacobea Navega o Camiño, que se vai celebrar entre os días 11 e 19 de xuño e constará de sete etapas nas que os barcos participantes pasarán por 15 dos 30 portos deportivos vencellados coa ruta marítima a Santiago.
A travesía comezará en Ribadeo, chegando a Padrón en catamarán, logo de percorrer o treito xacobeo-marítimo da nosa comarca, e completando a pé o último tramo do camiño ata Santiago.
Rosa Quintana destacou a “oportunidade que supón o Xacobeo 21-22 para reactivar o sector náutico galego e que poida recuperar os niveis de actividade previos á alerta sanitaria polo coronavirus”. Na mesma liña, a presidenta de Portos de Galicia, Susana Lenguas, afirmou que “Galicia é un destino seguro tamén por mar e que a rede autonómica de portos deportivos e instalacións náuticas adquire neste momento un valor estratéxico tanto para a promoción turística de Galicia como para a conmemoración do fito xacobeo”.
A travesía poderase realizar sen necesidade de inscrición, reservando soamente a praza de tránsito no porto no que se faga escala. Ademais, nesta edición está previsto que participen os barcos das entidades organizadoras, un barco de vela adaptado e coordinado pola Confederación Galega de Persoas con Discapacidade (COGAMI) e un barco oficial da Xunta de Galicia. Do mesmo xeito, nesta edición destaca a reivindicación do papel da muller na práctica náutica, xa que un dos barcos contará coa gañadora dunha medalla olímpica, Ángela Pumariega, que liderará unha tripulación composta maioritariamente por mulleres.
