Preocupación en Outes ante o retraso das obras da avenida de San Campio

O alcalde de Outes, Manolo González, vén de solicitar unha reunión co presidente da Deputación da Coruña, Valentín González Formoso, para abordar o estado no que se atopa a obra de humanización da Avenida de San Campio, na Serra de Outes. González indicou que dende novembro de 2020, cando foi aprobado o proxecto, non houbo avances na licitación desta obra que ascende a 420.000 € e coa que se pretende mellorar unha das arterias principais da vila da Serra. “É unha actuación pola que se leva agardando dende 2015 e os veciños non entenden que se produzan máis demoras”, apuntou o alcalde Outense.

Do mesmo xeito, o alcalde Manolo González tamén sinalou que pretende abordar co presidente outras actuacións necesarias para o concello, como son a construción de sendas peonís en estradas provinciais ao seu paso por Santo Ourente e Boel, a mellora da Praza do Concello na vila da Serra así como a inclusión do futuro centro de coworking e emprendemento de Outes na rede provincial de Espazos de Traballo.

Avenida San Campio. Outes