A ponte do Día das Letras Galegas vai achegar aos seareiros da vela unha serie de días a marcar no calendario. En concreto, celebrarase o XIV Memorial Alejandra Fernández de Láser, o preámbulo do Campionato de España ILCA Máster (programado para as aulas da Ría de Muros e Noia entre o 3 e o 6 de xuño). A cita desta ponte festiva, que se desenvolve entre o 15 e o 17 de maio, vén da man do Real Club Náutico de Portosín. Enmárcase no Trofeo Berberecho.
O Memorial disputarase en formato open, é dicir, aberto á participación nacional e internacional, o que en palabras do Club de Portosín “incentivará a presenza de regatistas doutras localidades españolas e do resto do mundo, como a confirmación de representantes do veciño país de Portugal”. Segundo informa Fernando González, comodoro do Real Club Náutico de Portosín, “para nós a organización do campionato galego da clase ILCA é unha responsabilidade pero sobre todo unha oportunidade para pór a proba a nosa capacidade organizativa pensando en que, un mes despois, temos o campionato de España Máster da mesma clase, con 70 regatistas dun gran nivel no noso club”.
Respecto ao Campionato de España ILCA Máster, o club vén de dar a coñecer a presidencia do comité, que correrá a cargo do leonés Ángel Puente, así como o oficial principal da regata, o coruñés Alberto Bolívar; o medidor, o tamén coruñés Miguel Cons; e os vogais do comité, o leonés, José Ángel Rodríguez, e o pobrense, Sergio del Río.
A día de hoxe, a listaxe de inscricións xa ofrece unha cifra superior ao medio centenar de regatistas, dos que 32 corresponden á categoría ILCA 6 e 21 ao ILCA 7.
Sumando adestradores, acompañantes e equipo de organización, Portosín prepárase para albergar a preto de 200 persoas que comporán a estadía na vila, sendo “un extraordinario empurrón para a economía local”, sinalan dende o Club Náutico.
