O presidente da Deputación e o alcalde de Boiro achegan o seu apoio a JEALSA e enxalzan o traballo dos bombeiros

O presidente da Deputación da Coruña, Valentín González, e máis o alcalde de Boiro, José Ramón Romero, visitaron na mañá deste 14 de maio a sede de JEALSA para ofrecer o seu apoio incondicional á empresa conserveira tras o duro revés do incendio da súa planta de Bodión acontecido a pasada fin de semana. González Formoso púxose a disposición do persoal e do equipo directivo da empresa para “afrontar o reto da reconstrución”. Ofreceu o apoio da Deputación da Coruña “ante calquera trámite”.

Durante a súa estadía en Boiro destacou tamén “o gran traballo dos bombeiros de Boiro e Ribeira”, pertencentes ao Consorcio Provincial Contraincendios, “nas tarefas de extinción do lume nunha fábrica fundamental para a socioeconomía de toda a comarca e de Galicia”.

Valentín González foi recibido na conserveira polo presidente de JEALSA, Jesús Manuel Alonso Escurís, que agradeceu o traballo de quen “estivo loitando contra as lapas”, así como o apoio das institucións, empregados, clientes e veciñanza de Boiro

Na visita ás instalacións tamén estiveron presentes o deputado da área de emerxencias, Blas García, o portavoz do Goberno provincial, Bernardo Fernández, e representantes dos bombeiros do Consorcio Provincial Contraincendios.

Novos investimentos

“Nesta visita atopámonos cunha dirección e un cadro de persoal francamente motivados para afrontar o reto de reconstrución e agora, desde as administracións temos que axudar cos novos investimentos que sexan necesarios”, informou González Formoso, que ofreceu ao presidente de JEALSA o apoio provincial. “Desde a Deputación xogamos un papel importante, de unión entre diferentes administracións e de ponte coa Xunta de Galicia e o Goberno do Estado, para que isto sexa un campo de acordo e consenso onde axudemos a reconstruír esta instalación da que nos sentimos moi orgullosos”, sinalou o presidente provincial, Valentín González Formoso.

Pola súa banda, o alcalde de Boiro tamén puxo a disposición a axuda do Concello en todo o necesario “como non podía ser doutro xeito”, incidiu, e engadiu: “Xa estabamos aí tanto no día do incendio como agora, axilizando os trámites que nos estaban pedindo e que dependen do Concello”.

O presidente de JEALSA, Jesús Manuel Alonso Escurís, tamén agradeceu o apoio “aos medios que estiveron informando, ás autoridades que nos están animando e facilitando todos os trámites, aos empregados polo seu traballo, aos clientes, aos provedores e aos veciños”. Na súa intervención indicou que agardan que a planta se poña en marcha nun prazo máximo dun mes desde o incendio. Tamén informou de que en non máis de 3 meses estará en funcionamento unha fábrica de lombos de atún e “o gran reto de arrancar este recinto coas instalacións novas en non máis alá dun ano”.

O presidente da Deputación, o alcalde de Boiro e o deputado responsábel de emerxencias tamén se achegaron na súa visita ao municipio ao parque de bombeiros de Boiro, onde foron recibidos polo xerente do Consorcio Provincial Contraincendios, o sarxento do parque boirense, Francisco Sampedro, e o suboficial Mauricio Calvo. No encontro salientaron o labor que fixeron os bombeiros de Boiro e Ribeira na extinción do incendio nas instalacións de JEALSA. “Estamos a falar dun incendio que podería arrasar a maior conserveira a nivel nacional e a segunda a nivel europeo”.

Pola súa banda o deputado responsábel de Emerxencias, Blas García, que se achegou o día do incendio para ofrecer axuda institucional, enxalzou “a importancia de atender ás necesidades dos bombeiros” e sinalou que “na medida do posíbel, pola parte que nos toca e nos compete desde a Deputación, axudaremos a mellorar os medios materiais e persoais dos que dispoñen”.

O alcalde de Boiro agradeceu á Deputación o seu compromiso co municipio, en especial ao presidente e ao deputado “pola preocupación que tiveron desde o primeiro momento” no incendio. Tamén puxo en valor o traballos dos “23 bombeiros que fixeron fronte ao lume”.