O Concello de Ribeira organiza o Concurso Literario Escolar das Letras Galegas

O Concello de Ribeira vén de poñer en marcha o Concurso Literario Escolar das Letras Galegas, con motivo da festividade deste luns 17 de maio, adicada este 2021 á poeta Xela Arias. Este ano o certame ribeirense celebra a súa 29ª edición e está destinado ao alumnado do municipio con idades comprendidas entre os 7 e os 13 anos.

O concurso terá tres modalidades: poesía, prosa e banda deseñada. A temática debe ser orixinal, libre e en lingua galega. Concretamente, a poesía e a prosa teñen que ter máximo 25 versos, mentres que a banda deseñada pódese escribir en 2 folios.

Todos os traballos estarán identificados co título e co pseudónimo, pero sen sinatura. En caso de presentar as obras do centro de ensino, haberá que asinalas con cadanseu pseudónimo, e entregaranse nun sobre no que se incluirá outro sobre pechado coa listaxe de participantes, centro de ensino, modalidade, idade, nome e apelidos, pseudónimos e títulos de cada obra.

En total, o xurado premiará aos 3 mellores traballos de cada categoría. Os agasallos consistirán en varios lotes de libros. Desta forma, o prazo para entregar as obras será do 24 e o 28 de maio no Centro Cultural Lustres Rivas.