O Concello de Boiro vén de realizar unha nova solicitude á entidade bancaria Abanca para que manteña a actividade do servizo de caixeiro automático en Escarabote.
Malia todos os esforzos e as peticións feitas pola veciñanza co total apoio do Goberno local, a entidade segue adiante coa súa decisión de pechar a sucursal que mantiña na parroquia de Lampón, onde viña dando servizo a un volume importante de poboación, moita dela xente maior que non dispón dos coñecementos precisos para facer uso da banca online nin tampouco para achegarse ao centro de Boiro con total comodidade e seguridade. Debido a isto, o Concello solicitou o mantemento do caixeiro.
Así nolo explican fontes do Goberno boirense: “A oficina que a entidade bancaria tiña no lugar de Escarabote vén de pechar de xeito inminente, desoíndo tanto as reclamacións da veciñanza de Lampón e das persoas usuarias como das peticións realizadas dende o Concello de Boiro, e privando á veciñanza da parroquia deste servizo esencial e obrigando ás persoas usuarias a desprazarse a outras entidades para realizar as súas xestións cotiás; por este motivo solicitamos a Abanca que manteña un caixeiro automático da entidade en Escarabote que permita levar a cabo á cidadanía xestións básicas como poden ser a retirada de efectivo ou pago de recibos sen necesidade de desprazarse”.
Para o devandito, o Concello ponse a disposición da entidade para prestar toda a colaboración que sexa necesaria e os trámites que sexan precisos para manter este servizo no mesmo lugar no que se atopa ou nunha dependencia de carácter municipal.
