Os Concellos da nosa comarca seguen a apoiar á veciñanza nas súas reclamacións para evitar máis peches de sucursais de Abanca. Se os días pasados dimos conta das conversas mantidas polo Goberno de Ribeira cos responsábeis comarcais da entidade para demandar que continúen abertas as oficinas da Palmeira, esta fin de semana o Concello de Boiro confirmou que mantén contacto estreito coa entidade para garantir que prosiga o servizo en Escarabote, onde está previsto o peche da sucursal. O alcalde, José Ramón Romero, mantivo este venres 7 unha xuntanza co director territorial da entidade e tamén coa Asociación de Veciños de Lampón.
O Concello de Boiro transmitiu á entidade “a importancia do servizo que presta no núcleo de Escarabote” e “o prexuízo que ocasionaría o seu peche para a veciñanza da zona”.
Esta xuntanza únese á solicitude expresa do Concello elaborada previamente para solicitar a permanencia de Abanca en Escarabote. A maiores, José Ramón Romero reuniuse con representantes da Asociación Club de Xubilados e Pensionistas Aroña de Santiago de Lampón, que presentaron arredor de 600 sinaturas da veciñanza para solicitar á entidade que non peche a oficina situada neste núcleo do municipio.
Os membros da asociación comunicaron ao alcalde a convocatoria dunha manifestación prevista para este martes día 11 de maio, ás 12.00 horas, diante da entidade de Abanca en Escarabote para mostrar o descontento coa decisión de pechar a mesma. O alcalde mostrou o apoio do Concello e “toda axuda para evitar o peche”. Por ese motivo está previsto que no vindeiro pleno se presente esta solicitude da cidadanía con vistas a lograr o apoio de toda a Corporación municipal.
