O camiño xacobeo A Orixe aterrará novamente no salón FITUR

A Mancomunidade Barbanza Arousa estará este mes de maio no salón FITUR, o evento turístico máis importante do ámbito estatal, para dar conta dos moitos atractivos da nosa comarca. En concreto, presentará a iniciativa A Orixe, que é como se coñece o percorrido do Camiño de Santiago que parte de Corrubedo e atravesa os concellos de Ribeira, A Pobra do Caramiñal, Boiro e Rianxo, constituíndose como o único destino que permite obter a acreditación Compostela por terra e por mar. Barbanza Arousa aterrará por segundo ano consecutivo en FITUR, que terá as súas portas abertas dende o 19 de maio até o 23 do mesmo mes.

O alcalde de Ribeira, Manuel Ruíz, nunha imaxe de arquivo da presentación da Orixe, acompañado dos restantes alcaldes da mancomunidade

A Orixe é un proxecto no que a Mancomunidade traballou man a man coa Asociación de Amigos do Camiño de Santiago do Barbanza A Orixe. Segundo avanza a nosa entidade turística, o itinerario milenario e o seu completo trasfondo histórico e cultural serán dados a coñecer nesta edición do salón poñéndose o foco na súa dupla vertente: esta ruta xacobea, xunto coa Ruta Mar de Arousa Río Ulla converten a Barbanza Arousa no único destino no que se pode obter a Compostela pola vía marítima, Ruta Mar de Arousa Río Ulla, e pola vía terrestre, Camiño do Barbanza – A Orixe.

A presentación terá lugar na caseta de Turismo de Galicia o mércores día 19 de maio ás 18:00 horas e poderá seguirse en directo por streaming a través da páxina web barbanzarousa.gal.