O alumnado do obradoiro de emprego O Pote (segunda edición) de Ribeira volve ser un exemplo de solidariedade. Desta volta, os responsábeis e integrantes do obradoiro organizaron unha actividade en colaboración con Cáritas Parroquial de Ribeira para a degustación duns almorzos saudábeis por parte dun grupo de mulleres senegalesas afincadas no concello que están recibindo clases de alfabetización impartidas pola devandita organización benéfica.
A realización dos almorzos veu da man do alumnos-traballadores do Programa de Emprego de Ribeira, da especialidade Operacións Básicas de Cociña, dirixido polo mestre Patxi Movilla.
A actividade levouse a cabo na Escola Municipal de Hostalería, sita no 2º andar do Edificio Mercado Municipal de Ribeira.
O obxectivo fundamental desta actividade foi, segundo reflicte o Concello, “achegar a estas mulleres e as súas respectivas familias uns aperitivos saudábeis, facendo entrega dos mesmos nas súas instalacións, sempre adaptándose á nova normalidade e gardando, en todo momento, as medidas hixiénico-sanitarias derivadas da situación actual da COVID-19”.
O Programa de Emprego O Pote II, que comezou o pasado 15 de novembro de 2020, ten programado realizar nas vindeiras semanas máis actividades con outras entidades de iniciativa social do Concello de Ribeira, tales como A Creba, Ambar, AGADEA, entre outras.
Trátase dun programa mixto de emprego e formación que ten por finalidade mellorar a ocupabilidade do alumnado-traballador, neste caso, 15 mozos/as incluídas no ficheiro do sistema nacional de Garantía Xuvenil, que está promovido polo Concello de Ribeira e subvencionado pola Consellería de Economía, Emprego e Industria e co-financiado pola Iniciativa de emprego xuvenil e o Fondo Social Europeo para o período 2014-2020.
