A Concellaría de Sanidade da Pobra do Caramiñal e a Asociación Anedia organizan este mes unhas xornadas sobre saúde e benestar. Haberá catro coloquios impartidos por persoal experto no eido sanitario.
A edil de Sanidade, Patricia Lojo, sinalou que “este programa configúrase coa finalidade de achegar á veciñanza os coñecementos precisos para mellora-la súa vida”. Na mesma liña, a presidenta da Anedia, María José Rego, destacou que “estas charlas abranguen diversos aspectos, dende a alimentación ao exercicio físico”
A primeira das sesións transcorrerá o 7 de maio co relatorio Compra Con-Ciencia, descifrando as etiquetas dos alimentos a cargo de Marta Sanmartín Toimil, farmacéutica e nutricionista. Mónica Rodríguez Castaño, enfermeira de pediatría no centro de saúde da Pobra, impartirá Primeiros auxilios para nais e pais o día 14. O ciclo continuará o 21 de maio con Exercicio físico na diabetes mellitus tipo 2, que dará Manuel Genaro Gutiérrez Fernández, médico de familia da atención primaria. Por último, Marian Rodríguez Blanco, xefa de pediatría do Hospital da Barbanza, ofrecerá E ti que podes comer? o día 28.
Todas as sesións transcorrerán a partir das 20:00 horas no Auditorio do Museo Valle- Inclán. As persoas interesadas en asistir poden formalizar a súa inscrición de balde a través do teléfono de contacto: 681173484.