A Asociación de Empresarios de Ribeira vai organizar a finais de maio un importante evento dirixido a dinamizar a economía local logo das adversidades da pandemia, poñendo o foco nun sector que tamén se viu moi afectado polas restricións e o estado de alarma: o sector do automóbil, con gran presenza no concello de Ribeira. Trátase da segunda edición da Feira do Automóbil Híbrido e Eléctrico.
Foi presentada este 20 de maio no Consistorio polo presidente da asociación, Francisco Martínez Gude, e o concelleiro de Comercio de Ribeira, Ramón Doval. O acto tamén contou coa presenza de Juan Rey, tesoureiro da patronal. Entre outras cousas, sinalaron que na feira participarán 60 coches pertencentes a 10 marcas. Tamén deron a coñecer o desfile de moda programado para o 30 de maio na praza do Concello, ás 18.00 horas.
II Feira do Automóbil
Celebrarase na praza de España, en Ribeira, durante os días 28, 29 e 30 de maio. O horario de apertura ao público será de 10.00 a 21.00 horas. Segundo informa a asociación, poderemos atopar vehículos de vangarda das principais marcas de automóbiles do mercado: Citroën, Toyota, Ford, Renault, BMW, Nissan, Mercedes, Kia, Hyundai e Peugeot.
As persoas interesadas nos modelos que se van presentar na feira, na que se porá o foco nos vehículos máis sustentábeis que se poden atopar nos concesionarios da nosa comarca (híbridos e eléctricos principalmente), terán ocasión de probalos e contarán, para coñecer todas as súas prestacións, coa axuda de persoal especializado.
A entrada será gratuíta.
Ribeira Fashion Show
No que se refire á primeira edición do Ribeira Fashion Show, celebrarase o domingo 30 a partir das 18 horas na praza do Concello e contará coa participación de vinte establecementos de diversos sectores, tales como moda, peiteados, deportes, óptica ou complementos. Tamén haberá control de aforo.
Francisco Martínez explicou que este programa “é o resultado de catro meses de traballo de Concello e asociación e quixo felicitar ao alcalde por nomear a Ramón Doval como concelleiro no ramo”. Tamén avanzou que “está previsto que o vicepresidente segundo da Xunta, Francisco Conde, acuda ao certame feiral”.
Pola súa parte, Ramón Doval informou de que a iniciativa forma parte do proxecto Ribeira un mar de comercio, que foi seleccionado no marco dos Proxectos Singulares Orientados á Modernización Comercial do Programa de Apoio á Competitividade do Comercio Minorista 2020, ao abeiro do cal o Concello e a Cámara de Comercio de España asinaron un convenio de colaboración cunha porcentaxe de co-financiamento mínimo do 80% de fondos FEDER.
