Proseguen en Porto do Son as actividades culturais para contrarrestar un panorama xeral, que malia ter mellorado un algo con este avance da primavera, aínda segue sen ser como debera ser. Este 15 de maio temos unha cita cun ingrediente especialmente necesario: o humor. Virá da man da actriz e monologuista galega Marita Martínez. As entradas están a venda dende esta semana, na Casa da Cultura en horario de 12.00 a 14.00 horas.
Como de costume, haberá que indicar no momento de mercar a entrada os datos de cada asistente (nome e teléfono). Amais, entregarase o importe xusto do número de entradas que se queiran mercar (5€/entrada).
Marita Martínez é un actriz improvisadora galega e unha das integrantes das Izquierdo Sisters, xunto con Lucía Veiga, coa que ten representado espectáculos tan sobranceiros como Galician Horror Story, no que dúas mulleres decimonónicas e con gran capacidade para establecer contacto con dimensións paralelas (as irmás Izquierdo) desvelan coa axuda do público os máis profundos misterios da nosa terra.
