Lousame volveu xuntar forzas para loitar contra a violencia de xénero

Lousame celebrou este venres 21 a oitava sesión da Mesa Local de Coordinación Interinstitucional fronte á violencia de xénero. Foi presidida pola concelleira de Igualdade, Silvia Agrafojo Filgueira, dando conta das actuacións previstas polo Concello dirixidas a combater as agresións contra as mulleres e a sensibilizar á poboación, especialmente á xente nova, sobre esta lacra. A reunión celebrouse con todas as medidas de seguridade determinadas polas autoridades sanitarias para a prevención fronte a COVID-19.

Na sesión participaron, ademais da propia concelleira, María Isabel Álvarez García, xefa da Unidade contra a violencia sobre a muller en A Coruña; Pilar Cobas Cajuso, directora do CPI Plurilingüe Cernadas de Castro; Avelino Rivadulla Iglesias, garda civil encargado das vítimas de VIOGEN; Natividad Hermo Santos, traballadora social de Lousame; e Mónica Castaño Ourille, técnica da Concellería de Igualdade.

No encontro, todas as persoas integrantes da Mesa informaron e compartiron experiencias sobre as distintas actuacións levadas a cabo pola súa entidade no ámbito municipal de Lousame. Así mesmo, Silvia Agrafojo aproveitou para anunciar que o Concello de Lousame vai levar a cabo, en colaboración co CPI Plurilingüe Cernadas de Castro, a segunda edición do programa Lousame Coeduca, subvencionado pola Secretaría Xeral de Igualdade. Este programa de actividades de sensibilización está dirixido a poboación infantil e xuvenil, dende 3 ata 16 anos, para favorecer a coeducación e a promoción da igualdade de oportunidades, que fomenten a desaparición dos roles e estereotipos de xénero, o bo trato, e a mellora da convivencia familiar e escolar. A iniciativa desenvolverase en colaboración coa comunidade educativa; colexio, ANPA e familias.

Co alumnado dende Educación Infantil ata quinto de Primaria realizaranse obradoiros co-educativos sobre estereotipos de xénero, corresponsabilidade familiar, visualización das mulleres da súa contorna e co-educación emocional. Co alumnado de 6º de Primaria e Secundaria desenvolveranse obradoiros onde se traballará a erradicación dos estereotipos e da violencia de xénero mediante o cine, o teatro, o baile e a radio. Tamén se tratará sobre a resolución pacífica dos conflitos.

Lousame Concilia Verán

Durante esta xornada, abordouse igualmente a nova edición do programa Lousame Concilia Verán, que promove a conciliación da vida familiar e laboral durante os meses de xullo e agosto. Trátase dunha iniciativa dirixida a nenos e nenas de entre 3 e 12 anos de idade que se desenvolve entre semana en horario de 09:30 a 14:30 horas. Na sesión sinalouse que en breve daranse a coñecer as datas exactas para a reserva de prazas. O número destas concretarase cando se coñezan as restricións de aforo vixentes durante o período no que se desenvolverá o programa.

Plan Municipal de Igualdade

Nesta sesión, Silvia Agrafojo deu conta das últimas actuacións levadas a cabo dende o seu departamento, do mesmo xeito que cada unha das persoas participantes na mesa realizou unha exposición do traballo xerado en materia de prevención de prevención da violencia de xénero dende a súa entidade na área de Lousame. Así, no último exercicio o Concello colaborou na difusión das distintas campañas contra a violencia de xénero realizadas pola Deputación da Coruña e polo Colexio Oficial de Traballo Social de Galicia, entre outras. Segundo fixo saber a edil, neste ano a maior parte de actividades e campañas tiveron lugar a través das novas tecnoloxías da información e da contorna dixital, “posto que as restricións derivadas da pandemia da COVID-19 limitaron a posibilidade de realizar actos presenciais”.

Asemade, a concelleira de Igualdade destacou dúas actividades realizadas nos últimos meses en contra da violencia de xénero, a Árbore do bo trato e o Entroido en Igualdade. A primeira é unha campaña que consistiu nunha imaxe simbólica dunhas sobreiras da localidade de Seoane, das que brotaron froitos en forma de propostas para a promoción do bo trato. Así, vídeos, a veciñanza enviou fotografías con texto e imaxes cunha reflexión sobre que se pode facer para promover o bo trato e loitar contra a violencia machista.

Pola súa banda, o Entroido en Igualdade foi unha iniciativa dos departamentos de Cultura, Igualdade e Deportes na que participou un amplo número de persoas para festexar o Entroido e conmemorar o Día Internacional da Muller. Constituíuse como un xogo no que os participantes tiñan que disfrazarse e buscar sete paneis con palabras chave sobre igualdade e facerse unha fotografía nese espazo para enviar ao departamento de Igualdade e participar nun sorteo de vales para mercar produtos deportivos.

A mesa acordou fixar o 12 de novembro como data para a vindeira xuntanza ordinaria.