A Concellaría de Medio Ambiente do Concello de Lousame vén de lanzar unha campaña informativa para facilitar á cidadanía unha xestión cómoda e axeitada á hora de desfacerse dos seus aparellos eléctricos e electrónicos e, tamén, de mobiliario e obxectos voluminosos. A campaña, que pon o foco nas redes sociais e nos móbiles, inclúe material gráfico para informar á veciñanza de como desfacerse correctamente dos seus refugallos. O obxectivo: contribuír a evitar vertedoiros incontrolados e fomentar a reciclaxe e os hábitos sustentábeis.
Na campaña recórdase que cada 15 días os equipos técnicos proceden á recollida baixo demanda de móbeis, colchóns, xoguetes non eléctricos e outros elementos de gran volume.
O Concello explica que para facer uso deste servizo é imprescindíbel realizar unha solicitude previa a través do teléfono 981 191 240. A partir de aí, o persoal municipal fixará a data na que as persoas usuarias poderán depositar o obxecto na área de subministro máis próxima (ben pode ser a carón dos colectores ou na planta de Servia). A recollida efectuarase dúas veces ao mes.
O Concello engade que no caso dos aparellos eléctricos e electrónicos (como ben poden ser neveiras, lavadoras, secadoras, televisións, teléfonos, etc) e de pequenos residuos de obras domésticas, “estes serán recollidos no propio domicilio”. A este respecto, o servizo executa a recollida o segundo luns de cada mes e tamén é necesario facer unha solicitude previa a través do teléfono 981 820 494.
O concelleiro de Medio Ambiente, Ramón Martínez, sinalou que “é tarefa de toda a sociedade coidar o medio no que vivimos e, por tanto, temos que ser conscientes da importancia de reciclar e de facer un correcto uso dos servizos municipais de recollida”.
