Gran participación na primeira etapa das andainas polo Camiño a Santiago da Ría de Muros Noia que organiza o Club de Xubilados de Lousame, en colaboración co Concello lousamiá. Setenta persoas tomaron parte na primeira camiñada, que se celebrou este domingo 31 de maio entre Portobravo e Fontefría. Unha participación moi significativa, xa que a media de participación en anteriores edicións era de cincuenta persoas.
O tempo acompañou e foron moitas as persoas que se animaron a facer este percorrido de 13 quilómetros seguindo a beira do río Vilacoba ata San Xusto. A andaina estivo guiada polo técnico municipal de Deportes, Germán Romero, mentres que o técnico municipal de Voluntariado, Xosé Manuel Outeiral, pechaba a expedición, para que a xente puidera facer o percorrido ao ritmo que lles resultase máis accesíbel.
A pesar de ser a etapa tecnicamente máis complicada, polas características do terreo, os participantes acudiron perfectamente equipados e non houbo que lamentar incidencia ningunha. A etapa foi fiel á súa fama como unha das máis fermosas desta ruta xacobea tanto polas fermosas e continuas paisaxes de bosque de ribeira como polos elementos patrimoniais presentes (papeleiras de Brandia, mosteiro de Toxosoutos…) rematando nas fervenzas de Toxosoutos.
Próxima etapa
Por outra banda, o Club de Xubilados de Lousame abriu este luns 1 de xuño as inscricións na segunda etapa, que se celebra o domingo 7 de xuño, entre Fontefría e Bertamiráns. “É a etapa máis sinxela porque é practicamente chan ou con pendente descendente na súa maioría e xa se pode levar calzado normal porque vai por pistas forestais e asfalto”, puntualiza Germán Romero.
As inscricións están abertas no Club de Xubilados de Lousame, na páxina web www.bandoticket.com ou enviando un Whatsapp ao 653 22 16 55. O prezo por participar é de 5 euros, un prezo que serve para custear autobús para levar aos camiñantes do punto de encontro (a praza Teodomiro Hidalgo de Lousame) a Fontefría e para traelos de volta dende Bertamiráns.
Finalmente, o domingo 14 de xuño terá lugar a derradeira etapa entre Bertamiráns e a praza do Obradoiro, 14 km de dificultade media, xa que hai algunha pendente pero non moi pronunciada.
