Esgotadas nun día as entradas da Romaría das Letras no Pazo de Goiáns

Unha das actividades estrela do programa cultural do Concello de Boiro para celebrar este 17 de maio, a Romaría das Letras 2021, xa ten as entradas esgotadas.

A actividade, que vén da man da Concellería de Cultura e a Asociación Cultural Barbantia, cubriu todas as vacantes dispoñíbeis en só 24 horas. Malia que o aforo viña limitado, por mor das circunstancias sanitarias actuais, a organización destacou positivamente o interese da cidadanía por participar na Romaría (prevista para o luns 17 de maio no Pazo de Goiáns), unha cita referente para conmemorar os libros e a nosa cultura.

O acto constará de dúas actuacións de baile galego, de Aroña e Xilbarbeira, dúas presentacións literarias, das obras Xela Arias. Poeta e tradutora de Anxo Xoan Rajó Pazó, e Nus de Manuel Gago; e vai concluír cun concerto de Os Melidaos.