O Concello de Boiro vén de realizar un proceso selectivo para a contratación de persoal que reforce o servizo da Oficina de Turismo durante o verán. O proceso realizarase co financiamento da Deputación da Coruña, mediante a subvención do Servizo de Promoción Económica, Turismo e Emprego para o gasto de persoal deste tipo de dependencias municipais durante o exercicio 2021.
O Concello lembra que a situación actual xerada pola COVID-19 fai que “o persoal de turismo e a actividade da oficina e doutros equipamentos do mesmo ámbito precisen aumentar a atención ao público para cumprir cos protocolos sanitarios”. Por este motivo, engade o Goberno local, “é preciso contar con persoal de reforzo que poida levar a cabo tarefas de control de capacidade e atención personalizada tanto na Oficina de Turismo situada na Casa Consistorial ou o Centro Arqueolóxico do Barbanza”.
Ao devandito cómpre engadir o de feito de que se estea a celebrar este ano o Xacobeo 2021, “polo que se incrementan as actividades de promoción, para o que se precisa persoal específico”, explica o Concello, engadindo tamén a necesidade de impulsar “outras accións ao longo do ano que se incrementan durante a época estival”, polo que o servizo reforzarase coa contratación dunha persoa entre os meses de maio e novembro e outra durante os meses de xullo e agosto.
Entre as accións a desenvolver están a de facilitar información ás persoas visitantes de itinerarios de interese no municipio e a comarca; subministrar información do Xeodestino Ría de Arousa; difundir eventos e actividades do Concello e outras actividades e eventos de promoción turística.
