Na tarde deste martes 25 de maio a área de Deportes do Concello de Porto do Son desenvolveu un curso gratuíto de vendaxes funcionais para a prevención e/ou recuperación de lesións deportivas. Os contidos viñeron da man de José María Caamaño Monteagudo, fisioterapeuta especializado neste tipo de mancaduras ligadas ao exercicio físico. O curso, segundo salientou o Concello, tivo gran acollida entre a veciñanza.
O obxectivo desta acción formativa foi concienciar á poboación da importancia de practicar deporte con seguridade e previr lesións, ademais de subministrar destrezas e habilidades para poder realizar eleccións saudables relativas á práctica do deporte.
