O Concello de Boiro, a través da área de Urbanismo, puxo en funcionamento un servizo de información e consultas sobre a transformación de antigos baixos comerciais en vivendas de uso turístico. Estará a disposición de todas as persoas interesadas. Este 6 de maio celebrouse a primeira xornada de consultas, na que foron atendidas sete persoas interesadas en dar unha segunda vida aos seus baixos.
Con esta iniciativa o Goberno local ten como obxectivo “dar impulso ao comercio e á hostalaría do municipio” e contribuír “á dinamización do tecido empresarial e económico á vez que se mellora a imaxe das zonas urbanas e se reduce a presión económica sobre os pisos en venda ou aluguer”.
Ao fío desta iniciativa, o departamento de Urbanismo xa atendeu máis de 20 chamadas de persoas interesadas na cuestión e concretou 7 citas presenciais para asistencia, cuxas dúbidas foron atendidas este xoves. Logo destes primeiros encontros, o Concello puido comprobar a existencia de dous posíbeis baixos convertidos en establecementos tipo hostel. As cinco consultas restantes tiveron relación con posíbeis aloxamentos turísticos (unha ou dúas unidades por local).
A seguinte xornada informativa para atención de citas vaise celebrar o xoves 20 de maio, para o que é preciso concretar cita previa no departamento do Urbanismo do Concello de Boiro.
