A Policía Local de Boiro fará controis de velocidade nos puntos máis conflitivos do municipio

A Policía Local de Boiro vai participar entre o 27 de maio e o 8 de xuño nunha campaña de control de velocidade de vehículos da Dirección Xeral de Tráfico. Esta acción ten como finalidade “fomentar a seguridade viaria no municipio, facendo fincapé nos puntos máis conflitivos e nos que se cometen mais infraccións polo exceso de velocidade”.

A furgoneta da Dirección Xeral de Tráfico, equipada con cinemómetro está estes días a disposición dos axentes de Boiro para facer controis preventivos. Esta medida está englobada nas accións que os axentes levan a cabo en materia de mobilidade para previr accidentes e outras incidencias ocasionadas polo exceso de velocidade.

Os controis entre os días 28 de maio e 8 de xuño vanse realizar nas vías urbanas e interurbanas, poñendo o foco nas estradas periféricas do municipio “ao ser os lugares nos que os axentes detectan os puntos máis conflitivos ao infrinxir os límites”, sinala o Concello.