A Deputación comunica que foi quen de pagar en sete horas as primeiras 100 axudas á hostalería e ás axencias de viaxes

A Deputación da Coruña vén de destacar o importante esforzo despregado para axilizar os pagos das axudas aos negocios de hostalería e axencias de viaxes que dende os concellos se acolleron ao plan Reactiva 2. Segundo fai saber, os pagamentos do primeiro centenar de axudas fixéronse nun prazo de sete horas. Trátase dunha importante liña de apoios destinados a autónomos e microempresas dos ditos sectores e emprazadas nos concellos de menos de 50.000 habitantes da provincia.

Segundo explicou a entidade que preside Valentín González, “apenas sete horas despois da apertura oficial do prazo de solicitudes, que comezou este luns 3 de maio ás 8.00 da mañá, un total de 712 pequenas empresas destes sectores solicitaran acollerse a este plan, das que 100 foron xa aboadas nas contas bancarias dos solicitantes ou están en trámite de pago, nun esforzo sen precedentes por parte dos diferentes servizos da Deputación da Coruña”.

E engadiu: “O noso obxectivo foi crear un sistema o máis áxil e eficaz posíbel, simplificando ao máximo a tramitación administrativa e xestionado todo o proceso directamente desde a propia Deputación”. Segundo estimou, estes apoios (que veñen cun orzamento total de 9 millóns de euros) chegarán a uns 6.000 pequenos negocios da provincia.

As axudas desta nova liña do programa Reactiva específica para hostalaría e axencias de viaxes teñen unha contía fixa de 1.500 euros por persoa ou entidade beneficiaria e concédense por orde de entrada da solicitude ata o esgotamento do crédito. Isto súmase aos 15,5 millóns de euros concedidos na primeira edición do programa Reactiva, impulsado pola Deputación en colaboración cos concellos coruñeses e destinado a autónomos e microempresas de todos os sectores afectados pola pandemia na provincia coruñesa.