O Real Club Náutico Portosín acolleu a primeira proba do Campionato Galego Inclusivo

O Real Club Náutico Portosín acolleu a primeira proba do Trofeo Fibralar – Campionato Galego de Motonáutica
Inclusiva, unha cita puntuable no cetro rexional que comezan liderando os noieses Pepe Barrio e Pilar Sarmiento, vixentes campións do título autonómico.
Nunha xornada premiada cunha excelente meteoroloxía, a pesar das previsións iniciais que indicaban fortes chuvieiros, preto dunha decena de equipos tomaron parte neste arranque de tempada, cunha brillante participación que poñía a proba aos novos pilotos que se estreaban no circuíto.
Sobre unha lámina de auga situada entre o porto pesqueiro e o deportivo, as embarcacións percorreron o circuíto montado con boias que, a modo de slalom, tiveron que ir sorteando nunha competición que premiaba o tempo medio empregado, a destreza e habilidades en determinadas probas, como o amarre, simulación de rescate, fondeo e
canastra de pelota, incorporando a realización de dous nós mariñeiros, un ballestrinque e un as de guía.
Tras os noieses Pepe Barrio e Pilar Sarmiento, facíanse coa prata provisional os sadenses Carlos Facal e Almudena Fagil, pechando o caixón do podio os tamén noieses Joaquín Barrio Guldrís e Joaquín Barrio Bouzas.

Na entrega de premios, que se celebrou no Salón Principal do club portosinense, estaban presentes o Comodoro e Vicecomodoro do mesmo, Fernando González e José García, respectivamente; o concelleiro de deportes do Concello de Porto do Son, Juan Francisco Pouso; e o Secretario da Real Federación Galega de Motonáutica, Marcos Casaleiro.
O Trofeo Fibralar de Motonáutica Inclusiva está organizado pola Real Federación Galega de Motonáutica, contando coa colaboración do proxecto inclusivo “Un mar para todos”.
A próxima cita celebrarase na localidade coruñesa de Outes, o 22 de maio, en augas do Freixo.

Pepe Barrio e Pilar Sarmiento